12-01-2018 16:49:32 | Հայաստան | Հասարակություն
Սիրիայում փաստացի նոր պատերազմ է սկսվել, որը տարվում է զուտ թուրքական զորքերին հյուսիսային Սիրիայից դուրս հանելու համար:
Այս մասին հունվարի 12-ին լրագրողների հետ հանդիպման ժամանակ նշեց քաղաքագետ Սերգեյ Շաքարյանցը:
Ըստ նրա՝ հյուսիսային Սիրիայից թուրքական զորքը դուրս մղելու քաղաքականությունը փոխհամաձայնեցված կերպով սկսել են Ռուսաստանը և Իրանը, ուստի պատահական չէ, որ Թուրքիայի արտգործնախարարություն են կանչվել հենց այդ երկու երկրների դեսպանները:
Քաղաքագետի կարծիքով՝ դժվար է կանխատեսել, թե երբ կավարտվեն այդ ռազմական գործողությունները, սակայն պետք է արձանագրել, որ առանցքային կետերից մեկը՝ Իդլիբ նահանգն արդեն ազատագրված է:
«Այս պատերազմը դեռ չեն անվանում Թուրքիայի դեմ, բայց փաստացի Ռուսաստանը և Իրանը ջանքեր չեն խնայում գոնե հյուսիսային Սիրիայում թուրքական զորքերի ներկայությունից ազատվելու համար»,- նշեց նա:
Ս. Շաքարյանցի խոսքերով՝ ով հովանավորել է «Իսլամական պետություն» ահաբեկչական խմբավորմանը, նա էլ հովանավորել է պատերազմը Սիրիայում:
«Եթե ոչ Ամերիկան, ապա Ամերիկայի դաշնակիցները, իսկ մենք բոլորս գիտենք, որ Սաուդյան Արաբիան, Եվրամիությունը ևս Ամերիկայի դաշնակիցներն են, վերջ ի վերջո պետք է իրատես լինենք: Պետք է համաձայնել Իրանի հատուկ ծառայությունների հետ, որոնք պնդում են, որ ԻՊ-ի ստեղծումը նույնպես պատկանում է ԱՄՆ-ին ու Իսրայելին»,- փաստեց քաղաքագետը:
Վերջինիս փոխանցմամբ՝ Իրանի գերագույն հոգևոր առաջնորդ այաթոլա Ալի Խամենեին կից գործում է «Նպատակահարմարության խորհուրդ» կոչվող մի հատուկ մարմին, որը Սիրիայում 2011 թվականից սկսված պատերազմի ընթացքում կուտակած լուրջ տեղեկատվություն ունի և սպասում է հարմար պահի այդ տեղեկատվությամբ աշխարհին զարմացնելու համար:
Էլիզա Զախարյան, «Նոյյան Տապան»
Նոյյան տապան – Հասարակություն
Լուրեր Հայաստանից եւ Սփյուռքից
